ಟಾಪರ್ ವಿದ್ಯಾರ್ಥಿಯಾಗೇಕೇ..? ಈ ಅಭ್ಯಾಸಗಳನ್ನು ಅಳವಡಿಸಿಕೊಳ್ಳಿ!

  • by

ಜೀವನದ ಅತ್ಯಮೂಲ್ಯ ಘಟ್ಟ ಎಂದರೆ ಅದು ವಿದ್ಯಾರ್ಥಿ ಜೀವನ ಎಂದು ಹೇಳಬಹುದು. ವಿದ್ಯಾರ್ಥಿಯ ಲೈಫ್ ಪ್ರತಿಯೊಬ್ಬ ವ್ಯಕ್ತಿಯ ಅಭಿವೃದ್ಧಿಯ ಮೂಲಾಧಾರ. ಒಬ್ಬ ವಿದ್ಯಾರ್ಥಿ ತನ್ನ ಸ್ಟೂಡೆಂಟ್ ಲೈಫ್ ನಲ್ಲಿ ಯಶಸ್ವಿಯಾಗಬೇಕಾದರೆ ಉತ್ತಮ ಶಾಲೆ ಹಾಗೂ ಉತ್ತಮ ಶಿಕ್ಷಕರು ಅಷ್ಟೇ ಮುಖ್ಯವಾಗುವುದಿಲ್ಲ. ಆ ವಿದ್ಯಾರ್ಥಿಯಲ್ಲಿ ಇರಬಹುದಾದ ಉತ್ತಮ ಅಭ್ಯಾಸಗಳು ಸಹ ಮುಖ್ಯವಾಗುತ್ತವೆ.

ಯಶಸ್ವಿ ಅಥವಾ ಟಾಪರ್ ವಿದ್ಯಾರ್ಥಿಯಾಗಲು ಹಾರ್ಡ್ ವರ್ಕ್ ಗಿಂತ ಸ್ಮಾರ್ಟ್ ವರ್ಕ್ ಮುಖ್ಯ. ಅಧ್ಯಯನದ ಬಗ್ಗೆ ನಿಖರತೆ ಹೊಂದಿರುವ ವಿದ್ಯಾರ್ಥಿಗಳು ತಮ್ಮ ಜೀವನದಲ್ಲಿ ಬೇಗನೆ ಯಶಸ್ಸು ಕಾಣುತ್ತಾರೆ. ನೀವು ಸಹ ಟಾಪರ್ ವಿದ್ಯಾರ್ಥಿಯಾಗಲು ಬಯಸಿದರೆ, ಧೈರ್ಯ ಕಳೆದುಕೊಳ್ಳಬೇಡಿ.. ಯಾವುದೇ ಕಾರಣಕ್ಕೂ ಬಿಟ್ಟು ಕೊಡಬೇಡಿ. ಶಾಲೆಯಲ್ಲಿ ಉತ್ತಮ ಗ್ರೇಡ್ ನಿಮ್ಮದಾಗಬೇಕಾದರೆ, ಈ ಕೆಳಗಿನ ಅಭ್ಯಾಸಗಳನ್ನು ಅಳವಡಿಸಿಕೊಳ್ಳಿ. ಈ ಮೂಲಕ ನಿಮ್ಮ ಜ್ಞಾನವನ್ನು ಹೆಚ್ಚಿಸಿಕೊಳ್ಳಬಹುದು. ಅಧ್ಯಯನ ಹಾಗೂ ವೃತ್ತಿ ಜೀವನದಲ್ಲಿ ಯಶಸ್ವಿ ಕಾಣಬಹುದು. ಇಂದಿನ ಲೇಖನದಲ್ಲಿ ಯಶಸ್ವಿ ವಿದ್ಯಾರ್ಥಿಗಳಲ್ಲಿ ಕಂಡು ಬರುವ 10 ಅತ್ಯುತ್ತಮ ಅಭ್ಯಾಸಗಳನ್ನು ಇಲ್ಲಿ ತಿಳಿಸಲಾಗಿದೆ.

ಒಂದು ಅಥವಾ ಎರಡು ಸೇಷನ್ ನಲ್ಲೇ ಓದು ಮುಗಿಸಿ

ಕೆಲವು ವಿದ್ಯಾರ್ಥಿಗಳು ಅಧ್ಯಯನ ಮಾಡುವಾಗ ಒಂದೇ ಬಾರಿಗೆ ಹೆಚ್ಚು ಓದುವ ಅಭ್ಯಾಸ ಹೊಂದಿರುತ್ತಾರೆ. ಅನೇಕ ವಿದ್ಯಾರ್ಥಿಗಳು ರಾತ್ರಿ ಇಡೀ ನಿದ್ದೆ ಗೆಟ್ಟು ಅಭ್ಯಾಸ ಮಾಡುವುದನ್ನು ನೋಡಿದ್ದೇವೆ. ಇಂತಹ ಅಭ್ಯಾಸ ನಿಮಗಿದ್ದರೆ ಬಿಟ್ಟು ಬಿಡಿ. ಯಾಕಂದರೆ ಯಶಸ್ವಿ ವಿದ್ಯಾರ್ಥಿಗಳು ಸಾಮಾನ್ಯವಾಗಿ ಕಡಿಮೆ ಅವಧಿಯಲ್ಲಿ ತಮ್ಮ ಕೆಲಸವನ್ನು ಮುಗಿಸುತ್ತಾರೆ. ಕೇವಲ ಒಂದು ಅಥವಾ ಎರಡು ಸೆಷನ್ ನಲ್ಲೇ ಓದು ಮುಗಿಸುತ್ತಾರೆ. ನೀವು ಸಹ ಯಶಸ್ವಿ ವಿದ್ಯಾರ್ಥಿಯಾಗಲು ಬಯಸಿದರೆ, ನಿಯಮಿತವಾಗಿ ಕಡಿಮೆ ಅವಧಿಯಲ್ಲಿ ಸ್ಟಡಿ ಮಾಡುವುದನ್ನು ಕಲಿಯುವುದು ತುಂಬಾ ಅವಶ್ಯಕವಾಗಿದೆ.

ಪ್ಲ್ಯಾನ್ ಪ್ರಕಾರ ಸ್ಟಡಿ ಮಾಡುವುದು

ಟಾಪರ್ ವಿದ್ಯಾರ್ಥಿಗಳು ಅಧ್ಯಯನ ಮಾಡುವಾಗ ವಾರ ಪೂರ್ತಿ ತಮ್ಮ ಸ್ಟಡಿ ಬಗ್ಗೆ ಟೈಮ್ ಟೇಬಲ್ ಹಾಕಿಕೊಂಡಿರುತ್ತಾರೆ. ನಂತರ ತಮ್ಮ ವೇಳಾಪಟ್ಟಿಯನ್ನು ಕಟ್ಟು ನಿಟ್ಟಾಗಿ ಅನುಸರಿಸುತ್ತಾರೆ. ಯೋಜನೆ ಎನ್ನವುದು ನಿರಂತರ ಪ್ರಕ್ರಿಯೆಯಾಗಿದ್ದು, ಇದು ಕಲಿಯಲು ಸಹಾಯ ಮಾಡುತ್ತದೆ. ಪಠ್ಯಕ್ರಮದ ವಿಷಯಗಳ ಬಗ್ಗೆ ಸಂಪೂರ್ಣ ಅರ್ಥವನ್ನು ತಿಳಿದುಕೊಳ್ಳಲು ನೆರವಾಗುತ್ತದೆ. ಹೀಗಾಗಿ ನೀವು ಸಹ ಅಭ್ಯಾಸದ ಬಗ್ಗೆ ದಿನಚರಿ ಮಾಡಿಕೊಳ್ಳಿ.

ಟೈಂ ಟೇಬಲ್ ಸೆಟ್ ಮಾಡುವುದು ಮುಖ್ಯ

ಪ್ರತಿಯೊಬ್ಬ ವಿದ್ಯಾರ್ಥಿ ತನ್ನ ಅಧ್ಯಯನಕ್ಕೆ ಸಮಯ ನಿಗದಿಪಡಿಸಬೇಕು. ದಿನಚರಿಯಂತೆ ಪ್ರಕಾರ ಸ್ಟಡಿ ಮಾಡುವುದು ಮುಖ್ಯವಲ್ಲ. ಅದರಂತೆ ನಿರ್ದಿಷ್ಠ ದಿನ ಹಾಗೂ ನಿರ್ದಿಷ್ಠ ದಿನಾಂಕಕ್ಕೆ ತಕ್ಕಂತೆ ವೇಳಾಪಟ್ಟಿ ಮಾಡಬೇಕಾಗುತ್ತದೆ. ಒಂದೇ ಸಮಯಕ್ಕೆ ತಕ್ಕಂತೆ ಅಭ್ಯಾಸ ಮಾಡಲು ಪ್ರಾರಂಭಿಸಬೇಕು. ಅಂದರೆ ಪ್ರತಿ ದಿನ ನೀವು ಯಾವ ಸಮಯಕ್ಕೆ ಅಭ್ಯಾಸ ಶುರು ಮಾಡುತ್ತೀರೋ ಅದೇ ಸಮಯಕ್ಕೆ ಪ್ರತಿ ದಿನ ಓದು ಪ್ರಾರಂಭ ಮಾಡಬೇಕಾಗುತ್ತದೆ. ಇದರಿಂದ ನೀವು ಮಾನಸಿಕವಾಗಿ ಹಾಗೂ ಭಾವನಾತ್ಮಕವಾಗಿ ಹೆಚ್ಚು ಸಿದ್ಧರಾಗುವುದಲ್ಲದೇ, ನಿಮ್ಮ ಉತ್ಪಾದನಾ ಶಕ್ತಿ ಕೂಡಾ ಹೆಚ್ಚುತ್ತದೆ. ಕೆಲವೊಮ್ಮೆ ಅನಿರೀಕ್ಷಿತವಾಗಿ ಯಾವುದೇ ಕೆಲಸ ಎದುರಾಗಬಹುದು. ಅಂಥ ಸಂದರ್ಭದಲ್ಲಿ ನಿಮ್ಮ ವೇಳಾಪಟ್ಟಿಯನ್ನು ಬದಲಾಯಿಸಬಹುದು, ಬಳಿಕ ಅದೇ ವೇಳಾಪಟ್ಟಿ ಅನುಗುಣವಾಗಿ ಮತ್ತೆ ಅಭ್ಯಾಸ ಮಾಡಬೇಕು.

ಅಧ್ಯಯನದ ಜತೆಗೆ ನಿರ್ದಿಷ್ಟ ಗುರಿ ಇರಲಿ

ಪ್ರತಿಯೊಬ್ಬ ವಿದ್ಯಾರ್ಥಿ ತನ್ನ ಓದಿನ ಬಗ್ಗೆ ನಿರ್ದಿಷ್ಟ ಗುರಿ ಹೊಂದಬೇಕಾಗುತ್ತದೆ. ಪ್ರತಿ ಸೆಷನ್ ಪ್ರಾರಂಭ ಮಾಡುವುದಕ್ಕೂ ಆ ಸೆಷನ್ ನಲ್ಲಿ ಯಾವ ಪಠ್ಯದ ವಿಷಯದ ಬಗ್ಗೆ ಅಭ್ಯಾಸ ಮಾಡಬೇಕು ಎಂಬ ಬಗ್ಗೆ ಗುರಿ ಹೊಂದಿರಬೇಕು. ವಿಷಯಗಳನ್ನು ಅಧ್ಯಯನ ಮಾಡುವಾಗ ಗುರಿ ಸ್ಪಷ್ಟವಾಗಿರಲಿ. ನಿಮ್ಮ ಗುರಿ ಏನು ಎಂದು ಮೊದಲು ಖಾತರಿಪಡಿಸಿಕೊಂಡು ನಂತರ ಓದಿಗೆ ತಕ್ಕಂತೆ ತಯಾರಿ ನಡೆಸಬಹುದು.

ಸಬ್ಜೆಕ್ಟ್  ಕ್ಲಿಷ್ಟಕರವಾಗಿದೆ ಎಂದು ಓದು ಮುಂದೂಡಬೇಡಿ

ಕೆಲ ವಿದ್ಯಾರ್ಥಿಗಳು ಸಬ್ಜೆಕ್ಟ್ ಕ್ಲಿಷ್ಟಕರವಾಗಿದೆ ಎಂದು ತುಂಬಾ ಸಲ ಓದನ್ನು ಮುಂದೂಡುತ್ತಾರೆ. ಆದ್ರೆ ಈ ಅಭ್ಯಾಸವೇ ಸಬ್ಜೆಕ್ಟ್ ಬಗೆಗಿನ ಆಸಕ್ತಿ ಕಡಿಮೆ ಮಾಡುತ್ತದೆ. ಟಾಪರ್ ಅಥವಾ ಯಶಸ್ವಿ ವಿದ್ಯಾರ್ಥಿಗಳು ಯಾವುದೇ ಕಾರಣಕ್ಕೂ ಪಠ್ಯದ ವಿಷಯ ಎಷ್ಟೇ ಕಠಿಣವಾಗಿದ್ದರೂ ತಮ್ಮ ಅಧ್ಯಯನವನ್ನು ಮುಂದೂಡುವುದಿಲ್ಲ.

Habits Highly Effective ,Students, study tips,ಟಾಪರ್ ವಿದ್ಯಾರ್ಥಿ, ಸ್ಟಡಿ ಟಿಪ್ಸ್,

ಕಠಿಣ ಸಬ್ಜೆಕ್ಟ್ ನಿಂದ ಓದು ಪ್ರಾರಂಭಿಸಿ

ಯಶಸ್ವಿ ವಿದ್ಯಾರ್ಥಿಗಳಲ್ಲಿ ಸಾಕಷ್ಟು ಉತ್ತಮ ಅಭ್ಯಾಸಗಳು ಕಂಡು ಬರುತ್ತವೆ. ಈ ಅಭ್ಯಾಸಗಳೇ ಆ ವಿದ್ಯಾರ್ಥಿಯನ್ನು ಯಶಸ್ವಿ ಅಥವಾ ಉತ್ತಮ ವ್ಯಕ್ತಿಯನ್ನಾಗಿ ಮಾಡುತ್ತವೆ. ಅದೇ ರೀತಿ ನಿಮಗೆ ಕ್ಲಿಷ್ಟಕರವಾದ ಸಬ್ಜೆಕ್ಟ್, ಅಥವಾ ಟಾಪಿಕ್ ನಿಂದ ಓದು ಪ್ರಾರಂಭಿಸಬೇಕು. ಮೊದಲು ಕ್ಲಿಷ್ಟಕರವಾದ ಕೆಲಸ ಪೂರ್ಣಗೊಳಿಸದ ಮೇಲೆ ಇತರ ಸಬ್ಜೆಕ್ಟ್ ಗಳನ್ನು ಪೂರ್ಣಗೊಳಿಸುವುದು ಸುಲಭವಾಗುತ್ತದೆ. ಅಲ್ಲದೇ, ಕ್ಲಿಷ್ಟಕರವಾದ ವಿಷಯ ಮೊದಲು ಪ್ರಾರಂಭಿಸುವುದರಿಂದ ನಿಮ್ಮ ಶೈಕ್ಷಣಿಕ ಕಾರ್ಯಕ್ಷಮತೆ ಹೆಚ್ಚಿಸಿಕೊಳ್ಳಬಹುದು.
ಪಾಯಿಂಟ್ಸ್ ಮಾಡಿಕೊಳ್ಳುವುದರ ಬಗ್ಗೆ ಆದ್ಯತೆ ನೀಡಿ.

ಬರೀ ಓದದರೆ ಸಾಕಾಗುವುದಿಲ್ಲ. ಜತೆಗೆ ಓದಿಗೂ ಮುನ್ನ ಪಾಯಿಂಟ್ಸ್ ಮಾಡಿಟ್ಟುಕೊಳ್ಳುವ ಅಭ್ಯಾಸವು ಒಳ್ಳೆಯದು. ಏನು ಓದಬೇಕು. ಎಂಬುದರ ಬಗ್ಗೆ ಪಾಯಿಂಟ್ಸ್ ರೂಪದಲ್ಲಿ ಟಿಪ್ಪಣಿ ಮಾಡಿಕೊಳ್ಳುವುದು ಮುಖ್ಯ. ಕಲಿತಿದ್ದನ್ನು ಮನನ ಮಾಡದಿದ್ದರೆ, ಬರೆಯದಿದ್ದರೆ ಅದು ಮುದ್ರಣವಾಗುವುದಿಲ್ಲ. ಮುದ್ರಣವಾಗಿದ್ದನ್ನು ಆಗಾಗ ನೆನೆಪಿಸಿಕೊಳ್ಳಲು ಪಾಯಿಂಟ್ಸ್, ಟಿಪ್ಪಣಿ ಬರೆದುಕೊಂಡು ನೆನೆಪು ಮಾಡಿಕೊಳ್ಳಬೇಕು. ಪ್ರತಿ ಅಧ್ಯಯನಕ್ಕೂ ಮುನ್ನ ಟಿಪ್ಪಣಿ ಮಾಡಿಕೊಳ್ಳುವ ಅಭ್ಯಾಸ ಮಾಡಿಕೊಂಡರೆ ಕಲಿತ ಪ್ರಮುಖ ವಿಷಯ ನೆನಪಿಟ್ಟುಕೊಳ್ಳಲು ಸಾಧ್ಯವಾಗುತ್ತದೆ. ಗಣಿತ, ಇತಿಹಾಸ, ಕೆಮೆಸ್ಟ್ರಿ ವಿಷಯಗಳ ಬಗ್ಗೆ ನೀವು ಓದುವಾಗ ಪಾಯಿಂಟ್ಸ್ ಮಾಡಿಕೊಳ್ಳಿ. ನೀವು ಓದಿರುವುದು ಮೈಂಡ್ ನಲ್ಲಿ ಉಳಿಯಲ್ಲ ಎಂದರೆ ಈ ಕ್ರಮ ಅನುಸರಿಸಬಹುದು.

ಓದುವಾಗ ಕಾನ್ಸಂಟ್ರೇಷನ್ ಇರಲಿ

ಸಾಮಾನ್ಯವಾಗಿ ಓದುವಾಗ ಕೆಲವರು ಓದಿನ ಕಡೆ ಗಮನ ನೀಡುವುದಿಲ್ಲ. ಸ್ಟಡಿ ಮಾಡಿದರೆ ಅಷ್ಟೇ ಸಾಲದು, ಮಕ್ಕಳಿಗೆ ಕಾನ್ಸಂಟ್ರೇಷನ್ ಹಾಗೂ ಇಂಟರೆಸ್ಟ್ ಕೂಡಾ ಇರಬೇಕಾಗುತ್ತದೆ. ಓದುವಾಗ ನಿಮ್ಮ ಗಮನ ಬೇರೆ ಕಡೆಗೆ ವಿಚಲಿತವಾಗಂದತೆ ಗಮನ ಹರಿಸಿ. ಹೀಗಾಗಿ ನೀವು ಅಧ್ಯಯನ ಮಾಡುವುದಕ್ಕೆ ಪ್ರಾರಂಭಿಸುವ ಮೊದಲು ಸರಿಯಾದ ಸ್ಥಳವನ್ನು ಆಯ್ಕೆ ಮಾಡಿ. ಆ ಸ್ಥಳದಿಂದ ಯಾವುದೇ ಶಬ್ದದಿಂದ ಕೂಡಿರಬಾರದು.

ಗ್ರೂಪ್ ಸ್ಟಡಿಗೆ ಹೆಚ್ಚಿನ ಪ್ರಾಶಸ್ಯ್ತ ನೀಡಿ.

ನಾವು ಪರೀಕ್ಷೆಗಾಗಿ ಓದಿದರೆ ಖಂಡಿತ ಫೇಲ್ ಆಗುತ್ತೇವೆ. ತಿಳುವಳಿಕೆಗಾಗಿ ಓದಿದರೆ ಪಾಸ್ ಆಗುತ್ತೇವೆ. ತಿಳುವಳಿಕೆ ಒಬ್ಬರಿಂದ ಒಬ್ಬರಿಗೆ ವಿಭಿನ್ನವಾಗಿರುತ್ತದೆ.ತಿಳಿದಿರುವ ವಿಷಯವನ್ನು ಶೇರ್ ಮಾಡುವುದಕ್ಕೆ ಗ್ರೂಪ್ ಸ್ಟಡೀಸ್ ಮುಖ್ಯ ಎಂದು ಹೇಳಬಹುದು. ತರಗತಿಯಲ್ಲಿ ಕಲಿಯಲಾಗದ ಹಲವು ವಿಷಯಗಳನ್ನು ಗ್ರೂಪ್ ಸ್ಟಡಿಯಲ್ಲಿ ಕಲಿಯಬಹುದು. ಗ್ರೂಪ್ ಸ್ಟಡಿ ಯಿಂದ ಕಠಿಣವಾಗಿರುವ ಟಾಪಿಕ್ ಸರಳವಾಗುತ್ತದೆ.

ವಾರಾಂತ್ಯಕ್ಕೆ ಟಿಪ್ಪಣಿ, ಶಾಲಾ ಕೆಲಸಗಳ ಬಗ್ಗೆ ಪರಿಶೀಲನೆ

ಟಾಪರ್ ವಿದ್ಯಾರ್ಥಿಗಳು ಇಡೀ ವಾರ ತಾವು ಏನು ಕಲಿತಿರುತ್ತಾರೋ ಅಂಥ ವಿಷಯದ ಬಗ್ಗೆ ವಾರದ ಕೆಡೆಯ ದಿನ ಪರಿಶೀಲನೆ ಮಾಡುತ್ತಾರೆ. ಯಶಸ್ವಿ ವಿದ್ಯಾರ್ಥಿಗಳು ಶಿಸ್ತು ಬದ್ಧ ಜೀವನ ಅನುಸರಿಸುತ್ತಾರೆ. ಈ ಎಲ್ಲಾ ಅಂಶವನ್ನು ನೀವು ನಿಮ್ಮ ಜೀವನದಲ್ಲಿ ರೂಢಿ ಮಾಡಿಕೊಂಡರೆ ಖಂಡಿತವಾಗಿಯೂ ಯಶಸ್ವಿ ವಿದ್ಯಾರ್ಥಿಯಾಗುವುದರಲ್ಲಿ ಯಾವ ಅನುಮಾನವೇ ಇಲ್ಲ.

ನಿಮ್ಮದೊಂದು ಉತ್ತರ

ನಿಮ್ಮ ಮಿಂಚಂಚೆ ವಿಳಾಸ ಎಲ್ಲೂ ಪ್ರಕಟವಾಗುವುದಿಲ್ಲ. ಅತ್ಯಗತ್ಯ ವಿವರಗಳನ್ನು * ಎಂದು ಗುರುತಿಸಲಾಗಿದೆ